အားလုံးကို ရပ်တန့်ဖို့
ဆုံးဖြတ်လိုက်တဲ့အခါ
တိမ်တိုက်တွေဟာ
ကိုယ့်လမ်း ကိုယ် ဆက်လျှောက်ခဲ့ကြတယ်
ကိုယ်တိုင် ပါဝင်ခွင့် မရတဲ့
ပုံပြင်အချို့အတွက်
ငါ ပေးခဲ့သမျှဟာ
သက်တံတစ်စင်းထက် အဖိုးထိုက်တန်လို့
ကိုယ်ရေးကိုယ်တာ မိုးရာသီရဲ့
တယောဆွဲသံမှာ
ငါဟာ နာရီတွေကို ရွက်လွှင့်
သန်းခေါင်ယံမှာ
ကြိုးပြတ်ခဲ့တဲ့ စောင်း လိုပေါ့
ရေပေါ်မှာ ရေးခဲ့တဲ့
အရုပ်မဟုတ်တော့
သက္ကရာဇ်အချို့ရဲ့ ရှုတ်ချမှုက
ငါ့ကို ခေါင်း ကိုက်စေခဲ့
တိုက်စားမှုတို့ရဲ့ အလံထူမှု
မအောင်မြင်တဲ့အခါ
ဆောင်း မရောက်ခင်မှာပဲ
သူတို့ရဲ့ ပင်လယ်တွေ
ရေစီးကြောင်း ပြောင်းခဲ့ကြတယ်
အတိတ်ဟာ
အတိတ်ဖြစ်ကြောင်း သက်သေပြဖို့
ကန့်လန့်ကာ ချဖို့ ကြိုးစားခဲ့တာ
အခါခါ
နွေညရဲ့ အိပ်မက်အချို့
ရေချိုးဆင်းတဲ့ အချိန်မှာ
ငါ ကိုက်ဝါးခဲ့တဲ့
နီရဲရဲ ပန်းသီးဟာ
အဆိပ်သုတ်လိမ်းထားသလား
အဆိပ် သုတ်လိမ်းမထားသလား
အမှန်တရားက
နာမည်ဝှက်များစွာနဲ့
ငါ့ မျက်ခုံးပေါ် လမ်းလျှောက်
မျက်တောင်ခတ်တိုင်း
မှောင်မှောင်သွားတာ
သတိမထားမိခဲ့ဘူး
ဆူးချွန်နဲ့ ထိုးဆွတာနဲ့
ဓားတုံးတုံး နဲ့ ခုတ်တာနဲ့
နာကျင်မှုဆိုတာ
ဒိုင်ခွက်ထဲ ထည့်ပြီး
နံပါတ်နဲ့ အဆင့်ခွဲလို့ မှ မရတာလေ
ရှောင်ဖယ်သွားခဲ့တဲ့
လိပ်ပြာတစ်ကောင်ရဲ့ အတ္တက
ငါ့အတွက်
မီးပင်လယ်မှာ ရွက်လွှင့်ရသလို
နေရစ်ခဲ့ရသူက
အစဉ်အမြဲ ရှင်သန်နေတဲ့
မီးတောင်ပါ
ကိုယ့်အတွက် ကိုယ် ကြည့်တိုင်း
အတ္တ မဟုတ်သလို
သူများအတွက် ကြည့်တိုင်းလည်း
မေတ္တာမဟုတ်ဘူး
ရွက်မဲ့သစ်ပင်ရဲ့
နွမ်းပါးမှုမျိုးနဲ့
စိတ်ခံစားချက်တွေတိုင်းအတွက်
ကြွေပေးမယ့်
သစ်ရွက် မဲ့ခဲ့ပြီ
နေ့သစ်တိုင်းမှာ
စိတ်သစ်မဖြစ်နိုင်ခဲ့တဲ့
စွဲလမ်းမှုမျိုးနဲ့
ငါ့ရဲ့ နံနက်ခင်းတွေဟာ
နှင်းကွဲဖို့ မေ့နေခဲ့တယ်
ကော်ဖီတစ်ခွက်ရဲ့
စွမ်းဆောင်ရည်မျိုးနဲ့
အဲဒီအရာက
ငါ့ကို
အခုထိ ညှင်းဆဲ
အကြောင်းမကြားဘဲ ရောက်လာတဲ့
မိုးရာသီကြောင့်
ဖရိုဖရဲ ထွက်ခွာခဲ့ရတဲ့
နွေရဲ့ ဘ၀က
လမ်းဘေး ဂျစ်ပစီတွေလို
ရံဖန်ရံခါများစွာရဲ့
အတိတ်စိမ်းပေးမှုက
အတည့်ယူရမလား
ပြောင်းပြန်ယူရမလား
နှုတ်ဖျားအချို့
ပျားရည်လူးတဲ့အခါ
ငါ့ အိတ်ကပ်ထဲ
ကြက်ခြေခတ် တွေ
ဝရုန်းသုန်းကား
မဖိတ်ခေါ်ဘဲ ရောက်လာတယ်
ကံတရားဆီမှာ
အာမခံထားတဲ့
ဘ၀တွေအတွက်
မနက်ဖြန်ဟာ
အဓိပ္ပာယ်များစွာနဲ့
ကောင်းကင်က ကြွေကျလာတဲ့
ကာရန်တစ်ပိုဒ်ကို
နံနက်ခင်းတွေမှာပဲ
ခံစားခွင့် ရှိတယ် တဲ့
ဘယ်နေ့ ဘယ်အချိန်မှန်းမသိ
ငါ ဆိုခဲ့ဖူးတဲ့ သစ္စာလည်း
သောကြာနေ့မှာ
တုန်းလုန်းပက်လက်
အိပ်မက်ချိုချိုတွေပေးတဲ့
မှားယွင်းမှုလေးတွေ
လိုက်ရှာရင်း
ငါ့ရဲ့ ပြဇာတ်က
မင်းသားမလို
မင်းသမီးမလို
ဒီလို မီးစာ ကုန်ခါနီး
ဆီမီးခွက်တို့
အစွမ်းကုန် လောင်ကျွမ်းချိန်မှာပဲ
ကာရန်တစ်ပိုဒ်နဲ့
ငါ့နှလုံးသား
တေးဆိုခဲ့တယ်။
မိုးအိမ်လူ
No comments:
Post a Comment