တနင်္ဂနွေ တနလာင်္
ချိုးကလေး မှန်မှန်လာ
@
တေးသံလေး ကြားရမှ နေ့တစ်နေ့ဟာ ပြည့်စုံသလို ကျွန်မ ခံစားနေမိတာ အတော်ကြာခဲ့ပြီ။ အင်း ကြာပြီသာ ပြောတာပါ နှစ်ပတ်
လောက်ပဲ ရှိဦးမလားပဲ။ ကျွန်မကလည်း ငှက်ကလေး တေးတစ်ပုဒ် ဆိုနေရင် ကမ္ဘာတစ်ခုကို ရောက်နေသလို ခံစား နေမိခဲ့လေတော့
အချိန်တွေဟာ ကျွန်မတစ်ယောက်တည်း အတွက် တစ်ကမ္ဘာစာ ကြာနေသလားပဲ။
ဒီတစ်ညတော့ ကောင်မလေးရာ
ဂစ်တာလေး တစ်လက် ကိုယ်ထမ်းလို့လာ
သံစဉ်လေးနဲ့ နင် အိပ်ဖို့ရာ
မီးလေး ဖွင့်ပါဦး
ဟော ကျွန်မ ငှက်ကလေး တေးဆိုနေပြီ။ ငှက်ကလေးတို့ အဖွဲ့ သီချင်းဆိုရင် အခြား အဖွဲ့တွေလို ပါသမျှ ကောင်လေးတွေ အကုန်
အပြိုင် ၀ိုင်းဆိုလေ့ မရှိကြဘူး။ ငှက်ကလေး တစ်ယောက်တည်း သီဆိုလေ့ရှိတယ်။ ငှက်ကလေး သီဆိုရတာ မောသွားရင်လည်း အခြား
ကောင်လေးတစ်ယောက်တည်းကပဲ သီဆိုတာ။ ဂစ်တာကိုလည်း ဖွဖွလေး တီးပြီး သီချင်း ငြိမ့်ငြိမ့်လေးတွေ သီဆိုလေ့ရှိကြတယ်။
အင်း သူတို့လာတဲ့ အချိန်ကပဲ ညဥ့်နက်ချိန် လူအိပ်ချိန်မို့လို့လားတော့မသိပါဘူး။ ဘာပဲပြောပြော အဲ့လို တစ်ယောက်တည်း သီဆိုပြီး
ဂစ်တာသံစဉ် ဖွဖွလေး တီးတဲ့ အသံလေးကို ကျွန်မ အရမ်း သဘောကျမိတယ်။
@
အင်္ဂါ ဗုဒ္ဓဟူး
ချိုးကလေး တကူးကူး
@
ငှက်ကလေးဟာ ဘယ်သူ့အတွက် သီချင်းတွေ လာလာဆိုမှန်း ကျွန်မ အစ က မသိဘူး။ နောက်မှ တစ်ခန်းကျော်က ဂျီတီစီ ကျောင်းသူ
ညီမလေးက ငှက်ကလေးတို့ အဖွဲ့ ကောင်လေးတစ်ယောက်က သူ့ကို ချစ်ရေးဆိုထားတယ်ပြောမှ အဲဒီညီမလေးအတွက် လာဆိုကြမှန်း
သိကြတာ။ အဲဒီညီမလေး ပြောစကားအရတော့ သူလည်း ငှက်ကလေးကို မသိဘူးတဲ့။ ကျန်တဲ့ကောင်လေးတွေ အကုန်လုံးကိုတော့
သူ သိသတဲ့။ ငှက်ကလေးကိုတော့ တစ်ခါမှ မမြင်ဖူးဘူးတဲ့။ အင်း ဟုတ်တော့ဟုတ်တယ် ။ နေ့ခင်းဘက်တွေမှာ လည်း မြို့ထဲဘက်တွေ
ဘာတွေ ကျွန်မထွက်ရင် ငှက်ကလေးကို အလိုလို ရှာမိတယ်။ အခုလို လမ်းမီးရောင်မှိန်မှိန်အောက်မှာ မြင်ရတဲ့ ငှက်ကလေးကို
နေ့ဘက် နေ့အလင်းရောင်အောက်မှာ ကျွန်မ ကောင်းကောင်းကြီး မြင်ဖူးချင်မိတယ်။ ဘာကြောင့်လဲတော့ ကျွန်မ ကိုယ် ကျွန်မလည်း
သေချာ ရေရာ မသိပါဘူး။ အဆိုကောင်းတဲ့ သူတစ်ယောက်ကို ကောင်းကောင်း မြင်ဖူးချင်ရုံ သက်သက်ပဲလို့ ကျွန်မကိုယ် ကျွန်မ
တွေးထင်နေမိတယ်။
လွန်ပါစေ အလွမ်းညတွေ
လွန်ပါစေ လွန်ပါစေ
ဆောင်းအကုန် နွေအကူး ရာသီဥတုက နေလို့ကောင်းနေပေမယ့် ညပိုင်းမှ အအေးဓာတ်က လုံးလုံးပျော်ကမသွားသေးတတ်ဘူး။
ငှက်ကလေးဟာ သီချင်းတွေ တစ်ပုဒ်ပြီး တစ်ပုဒ် သီဆိုလို့။ ကျွန်မရဲ့ ညကမ္ဘာလေးဟာ ငှက်ကလေးရဲ့ သီချင်းသံလေးနဲ့ သာယာ
ငြိမ့်ညောင်းလို့။
@
ကြာသပတေး သောကြာ
ချိုးကလေး ကူသံသာ
@
အဲ့ဒါ ဆက် လေ လို့ ရန်ကုန်က ခဏ ပြန်လာတဲ့ အဆောင်ပိုင်ရှင် သမီး အစ်မကြီး ပြောမှ ငှက်ကလေးရဲ့ နာမည်ကို သိရတယ်။
ဆက် ဟုတ်လား နာမည်ကလည်း တစ်လုံးတည်းလား လို့ ကျွန်မက အတွန့်တက်ပြီး မေးကြည့်တော့ မဟုတ်ဘူး ညီမရဲ့ သူနဲ့သိတဲ့
ခင်တဲ့သူတိုင်းက အဖျားဆွတ်ခေါ်တဲ့နာမည် နာမည်အရင်းက လင်းဆက် တဲ့ အစ်မတို့နဲ့ ဆယ်တန်း အတူတူအောင်တာလေ။
အင်း ဆက် က စာတော်တယ်။ ငယ်ငယ်တုန်းကပေါ့။ ဆေးကျောင်းဝင်တယ်လေ။ နောက်ပိုင်း သူတို့ တွဲနေကြ သူငယ်ချင်း တွေ
ဘာပြဿနာဖြစ်ကြတယ်မသိဘူး ဆက် တစ်ယောက် ပေပေတေတေ ဖြစ်သွားတယ်။ ဆေးကျောင်းကနေ လည်း စာမေးပွဲတွေ ကျလွန်း
လို့ ထွက်လိုက်ရတယ် အဝေးသေင် ပြောင်းသွားတယ် ပြောကြပေမယ့် ကျောင်း ဆက်တက်ပုံ မပေါ်ပါဘူး လို့ အစ်မကြီးက ပြောတော့
ကျွန်မ စိတ်ထဲ အစိုင်အခဲ တစ်ခု ၀င်ရောက်သွားသလို ဆို့နင့် မွန်းကြပ်သွားတယ်။ သူ့သူငယ်ချင်းတွေနဲ့က ဘာဖြစ်တာလဲ အစ်မ ။
အဲ့ဒါတော့ အစ်မလည်း သေချာမသိဘူး။ သူတို့ ငယ်ငယ်လေးကတည်း အတူတူ ပေါင်းလာတယ် သူငယ်ချင်း ငါးယောက်ရှိတယ်လေ။
ကောင်လေး သုံးယောက် ကောင်မလေး နှစ်ယောက်။ သူတို့ အချင်းချင်း ဘာပြဿနာဖြစ်ကြတယ်ဆိုတာတော့ သူတို့ကလွဲပြီး ဘယ်သူ
မှ မသိကြရှာဘူး။ အဲဒီနောက်ပိုင်း ဆက် အပါအ၀င် အဲဒီငါးယောက်စလုံး အကြောင်း အမျိုးမျိုးနဲ့ ဒီမြို့ကနေ ထွက်သွားကြတယ်။
ကောင်မလေးနှစ်ယောက်နဲ့ ကောင်လေးတစ်ယောက်ကတော့ နိုင်ငံခြား အထိ ပြောင်းသွားကြတယ်ဆိုလားပဲ။ အော် ဟုသာ ကျွန်မ
ပြန်ပြောမိတယ်။ ဘယ်လို ခက်ခဲမှုတွေက ကျွန်မရဲ့ ငှက်ကလေးကို အပေအတေ ဖြစ်စေခဲ့တာပါလိမ့်လို့ ကျွန်မ တွေးနေမိတယ်။
အခုလည်း ဆက် ဒီမြို့ကို ဘာလာလုပ်တယ် မသိဘူး။ ကလေးတွေနဲ့ပေါင်းပြီး ပေါက်တက်ကရလုပ်ဦးမယ်တူပါရဲ့။ သူတို့အဖွဲ့ထဲမှာ
ဆက် တစ်ယောက်က လူချစ်လူခင် အပေါဆုံးပဲ။ ဆက်က ဖော်ရွေတယ်။ ပျော်တတ်တယ်။ ဟာသဥာဏ်လည်း ရှိတယ်။ သူနဲ့တွေ့တဲ့
လူတိုင်း သူ့ကို ချစ်ကြ ခင်ကြတယ်။
ဘယ်ဆီကို မင်းရောက်နေလဲ
ဘာတွေကို မင်း လုပ်နေမလဲ
ကျွန်မရဲ့ ငှက်ကလေးကတော့ သီချင်းတွေ သီဆိုလို့ ကောင်းတုန်းပါပဲ။ ညီမက ဆက် ကို စိတ်ဝင်စားလို့လား လို့ အစ်မကြီးက မေး
တော့ ကျွန်မလည်း အင်းဟုတ်တယ် ဆိုပြီး ချက်ချင်းပြန်ဖြေလိုက်မိတယ်။ အော်အော် ဆက် က ချောပါတယ် လို့လည်း သူ နားလည်
သလို ကောက်ချက် ချလေတယ်။ အဲဒီတော့ ကျွန်မမှာ မနေသာဘဲ အဲ့လို မဟုတ်ဘူး အစ်မရဲ့။ ကျွန်မ သူ့ကို သေသေချာချာ တစ်ခါမှ
မမြင်ဖူးဘူး။ သူ က သီချင်းဆို သိပ်ကောင်းလို့ စိတ်ဝင်စားမိရုံ သက်သက်ပါ။ လို့ ရှင်းပြတော့ အင်း ဟုတ်တယ်လို့ ပြန်ထောက်ခံ
တယ်။ စိတ်ဝင်စားရုံက ပြဿနာ မရှိပါဘူး ညီမရဲ့ ။ အဟင်း ချစ်မိရင်တော့ သိပ်မကောင်းလှဘူး မိန်ကလေးတစ်ယောက်အတွက်လေ
လို့ ဆက်ပြောပြန်တယ်။ ချစ်တယ် မချစ်ဘူးဆိုတာ ညီမ သိပ်မသိဘူး။ ဆိုလိုတာက ညီမအနေနဲ့ အချစ်ဆိုတာကို မသိဘူး။
အချစ်ဆိုတာ ဒီလို အသံ ဒါမှမဟုတ် တစ်ခုခုကို ကြားလို့ မြင်လို့ စွဲလမ်းရုံနဲ့ ဖြစ်ပေါ်တတ်တဲ့ အရာလို့လည်း ညီမ မမြင်ဘူး။
စွဲလမ်းမှုနဲ့ အချစ်ဟာ သီခြား ဖြစ်တည်မှုကိုယ်စီနဲ့ ရှိကြတယ်လို့ ညီမ မြင်တယ်။ ချစ်လို့ စွဲလမ်းတာ စွဲလမ်းလို့ ချစ်တယ်ဆိုတာ
ဆင်ခြင်တုံတရားကို ကောင်းကောင်း အသုံးမချနိုင်တဲ့လူတွေပဲ ဖြစ်တတ်တဲ့ အမှားလို့ ညီမ မြင်တယ် လို့ ကျွန်မ ရှည်ရှည်ဝေးဝေး
ပြောပြမိတယ်။ ပြောပြီးမှ ငါ လျှာရှည်မိပြန်ပြီလို့လည်း ကျွန်မကိုယ် ကျွန်မ အပြစ်တင်မိပြန်တယ်။ အစ်မကတော့ ဘာမှပြန်မပြောဘဲ
ခေါင်းလေး တညိတ်ညိတ် လုပ်ရင်း ငှက်ကလေး ရဲ့ သီချင်းသံကို နားထောင်နေသလိုလို နဲ့ နံရံကို ငေးနေလေရဲ့။
ဒီညဟာ ကောင်းကင်မှာ သောကြာကြယ် တောက်ပနိုင်မယ့် နောက်ဆုံးည ဖြစ်တယ်ဆိုတာကို နောက်နေ့ ရောက်မှ ကျွန်မ သိခဲ့ရတယ်။
@
စနေ မှာ မလာအား
ချိုးကလေး ပြန်လို့သွား
@ @ @
မိုးအိမ်လူ
၁၇ နိုဝင်ဘာ ၂၀၁၁
ည ကိုးနာရီ ထိုးပြီး တစ်မိနစ်
#..# ၂၀၀၉ ၊ ၂၀၁၀ သူငယ်ချင်းများနှင့် အတူ ကောင်မလေး အဆောင်ရှေ့မှာ သီချင်းဆိုခဲ့တာတွေကို အမှတ်ရရင်း အိပ်မက်ရှည်တစ်ပုဒ်ကို ကျွန်တော် အစ ဆွဲထုတ်မိသွားပြီ။ #..#
No comments:
Post a Comment