စစ်တမ်း
စိတ်လို လက်ရ အမှားတွေနဲ့
ကျဉ်းကျပ်သွားတဲ့ စိတ်ဧရိယာ 24
ခံစားရတာ မကောင်းတဲ့ အခါမျိုးမှာ
သီချင်းတွေ ( ဘာမှ ငါ မကြားချင်ဘူး မသိချင်ဘူး
ငါ့ဘ၀ကို ငါ့ဆီပေးပါ..။
ဖြူစင်ချိန်တွေ ပြန်မရဘူး
အရောင်တွေ ပေစွန်းလို့
ငါ့ဘ၀ ယုံနိုင်သူ မရှိတော့ ) ဆိုညည်းမိတဲ့ အခြေအနေ တစ်စိတ်တစ်ဒေသဟာ
မှောင်ရိပ်ထိုးတဲ့ ဘ၀ရဲ့ အပိုင်းအစ တွေအဖြစ်
အသက်တွေလည်း ပြန်ပြန် ငယ်မသွားတော့ဘူး
ပြန်ပြန် ငယ်မသွားတဲ့ အသက်တွေကို ဆွဲဆန့်ထုတ်ရင်း
တံဆိပ်တွေ သတ်မှတ်ချက်တွေ ( ကဗျာဆရာ။ အင်ဂျင်နီယာ ။
ခပ်ကြောင် ကြောင်။ ဘာမှမသိ )
ရှာရမလား မရှာဘူးလား လိုချင်မိသလား မလိုချင်မိဘူးလား
ဒီလို လစ်ဟ နေတဲ့ စိတ်ကွက်လပ်တွေ လည်း
နေ၀င်နေထွက် မရှုရှိုက်သင့်တာတွေပဲ ပြည့်နေတဲ့
တစ်ဦးပိုင် လေထုထဲ
အညစ်အကြေးတွေမှန်း သိသိကြီးနဲ့
ခန္ဓာ ထဲ ထိုးထည့်နေမိ
ဒီလိုပဲလား ဒီလိုပဲလား D လိုဆိုရင်တော့
ဘ၀ဟာ မလှတော့သလို အသက်ရှုရတာလည်း မလှတော့ဘူး
ဆိုလိုရင်း ရည်ရွယ်ချက်တွေ ကိုယ့်ဘာသာ ရှာဖွေ ဖျောက်ဖျက်ရင်း
( ကဗျာတွေ ရေးချင်တဲ့စိတ်ကို မရဲရင့်နိုင်မှုက အသေသတ်တယ်။
အသက်မွေးဝမ်းကျောင်းအလုပ်မှာ မပျော်ပိုက်နိုင်မှုကို
ဝါသနာထဲ အန်အန်ချရတဲ့ နေ့စွဲတွေအတွက်
ကိုယ့်ကိုကိုယ် လိပ်ပြာမလုံမှုတွေ ခဏခဏ ။ )
ကြယ်ကြွေချိန်တွေမှာ ဆုတောင်းပျောက်နေတဲ့ ကျွန်တော်/ငါ ထဲက
အတ္တ/ လောဘ / မာန်မာန / မောဟ များ။
မိုးအိမ်လူ
No comments:
Post a Comment